Суседнія раёны з Браславам

Мёрскі раён

Вадаспад на р. Вята – выдатнае месца для аматараў маляўнічых пейзажаў.
У XIX стагоддзі тут стаяў вадзяны млын, руіны якога можна ўбачыць і сёння. У сярэдзіне мінулага стагоддзя рака забяспечвала электрычнасцю навакольныя населеныя пункты. Для павелічэння магутнасці ГЭС пабудавалі штучны вадаспад двухметровай вышыні. Дзейнічала электрастанцыя нядоўга, у 60-я гады мінулага стагоддзя яна прыйшла ў заняпад.
Даехаць да вадаспада можна праз аграгарадок Друя (арыенцір в. Ідолта і в. Мілашова) або праз Мёры (напрамак на в. Ідолта і Мілашова).
Балота Ельня – гэта самае вялікае вярховае балота ў Беларусі і пятае па велічыні ў Еўропе. Тут створаны экалагічныя сцежкі, можна заказаць экскурсіі.

Пастаўскі раён

• Паставы, палац Тызенгаўзаў. У цяперашні час размешчаны музей з экспазіцыяй, якая складаецца з 3 частак: першая апавядае пра ўладальнікаў палаца – Тызенгаўзаў, другая – пра кавалерыйскую школу, трэцяя – пра Першую сусветную вайну.
• Вёска Парыж. Вёска, у якой ёсць уласная Эйфелева вежа.
• Камаі. Невялікая вёска з адным з найстарэйшых касцёлаў Беларусі. Касцёл Святога Яна Хрысціцеля быў пабудаваны ў 1603–1606 гг. і адносіцца да абарончага тыпу храмаў (рэдкі для Беларусі). Тут жа знаходзіцца самы стары арган Беларусі.
• Лынтупы. Можна паглядзець сядзібу Бішэўскіх і касцёл Святога Андрэя Апостала.

Глыбоцкі раён

Глыбокае. Асноўнымі славутасцямі горада з’яўляюцца касцёл Святой Тройцы і сабор Раства Прасвятой Багародзіцы, размешчаныя адзін насупраць аднаго і падобныя знешне.

Яшчэ адной цікавай славутасцю горада Глыбокае з’яўляецца невялікая каталіцкая капліца Святога Ільі (1804 г.). Побач з капліцай знаходзіцца мемарыяльная калона ў гонар Канстытуцыі Рэчы Паспалітай ад 3 мая 1791 года. Помнікаў, прысвечанай гэтай падзеі, у Беларусі практычна няма. Дарэчы, такая ж калона ёсць у Мёрскім раёне (в. Лявонпаль).

Мосар

Асноўнай славутасцю вёскі Мосар з’яўляецца касцёл Святой Ганны (1792 г.). Гэты касцёл вядомы ў Беларусі і за яе межамі дзякуючы аб’ектам, многія з якіх адзіныя такога тыпу ў Беларусі. Гэта першы ў Беларусі (па даце пабудовы) помнік Яну Паўлу II, Алея цвярозасці, адзіны ў Беларусі антыалкагольны музей і інш. Хараство касцёла і дагледжанасць сталі рэальнасцю дзякуючы невычарпальнай энергіі ксяндза Юозаса Булькі (1925–2010), які прыехаў на службу ў вёску Мосар у 1989 годзе. Менавіта дзякуючы яго намаганням і пад яго кіраўніцтвам, або нават непасрэдна яго рукамі, была створана большасць аб’ектаў.